40 വര്‍ഷത്തിനിടെ ദക്ഷിണേഷ്യ ഏറ്റവും മോശം സാമ്പത്തിക മാന്ദ്യത്തിലേക്ക്
കൊറോണ വൈറസ് വ്യാപനം ദക്ഷിണേഷ്യയെ ഏറ്റവും മോശം സാമ്പത്തിക മാന്ദ്യത്തിലേക്ക് നയിക്കുകയാണെന്ന് ലോക ബാങ്ക്. 40 വര്‍ഷത്തിനിടെ ആദ്യമായാണ് ഇത്തരമൊരു ആഘാതം സാമ്പത്തിക മേഖലയ്ക്കുണ്ടാകുന്നത്. മറികടക്കാൻ അടിയന്തിര നടപടികളും ലോകബാങ്ക് നിർദ്ദേശിച്ചു.
കൊറോണ വൈറസ് പൊട്ടിപ്പുറപ്പെട്ടതിനെത്തുടര്‍ന്ന് ഇന്ത്യയും മറ്റ് ദക്ഷിണേഷ്യന്‍ രാജ്യങ്ങളും ഈ വര്‍ഷം നാല് പതിറ്റാണ്ടിനിടയിലെ ഏറ്റവും മോശം വളര്‍ച്ച രേഖപ്പെടുത്തുമെന്ന് ലോക ബാങ്ക് ഞായറാഴ്ച അറിയിച്ചു. എട്ട് രാജ്യങ്ങള്‍ ഉള്‍പ്പെടുന്ന ദക്ഷിണേഷ്യന്‍ മേഖല ഈ വര്‍ഷം 1.8 ശതമാനം മുതല്‍ 2.8 ശതമാനം വരെ സാമ്പത്തിക വളര്‍ച്ച കാണിക്കും. ആറുമാസം മുമ്പ് പ്രതീക്ഷിച്ച 6.3 ശതമാനത്തില്‍ നിന്ന് വളരെ കുറവാണിത്.
ഇന്ത്യ കൂടാതെ, ശ്രീലങ്ക, നേപ്പാള്‍, ഭൂട്ടാന്‍, ബംഗ്ലാദേശ് എന്നീ രാജ്യങ്ങളുടെ സാമ്പത്തിക വളര്‍ച്ചയിലും കുത്തനെ ഇടിവുണ്ടാകുമെന്ന് ലോക ബാങ്ക് പ്രവചിക്കുന്നു. പാക്കിസ്ഥാന്‍, അഫ്ഗാനിസ്ഥാന്‍, മാലിദ്വീപ് എന്നീ മൂന്ന് രാജ്യങ്ങള്‍ സാമ്പത്തിക മാന്ദ്യത്തില്‍ അകപ്പെടും. ഏപ്രില്‍ 7 വരെ ലഭ്യമായ രാജ്യാന്തര വിവരങ്ങളുടെ അടിസ്ഥാനത്തിലാണ് ലോകബാങ്ക് ഇക്കാര്യം വെളിപ്പെടുത്തിയത്.
ലോക്ക്ഡൗണില്‍ പെട്ടുകിടക്കുന്നത് 1.3 ബില്യണ്‍ ജനങ്ങളാണ്. ദശലക്ഷക്കണക്കിന് ആളുകള്‍ക്ക് ജോലി നഷ്ടമായി, വന്‍കിട, ചെറുകിട കച്ചവടം തടസ്സപ്പെട്ടു, നഗരങ്ങളില്‍ നിന്ന് കുടിയേറ്റ തൊഴിലാളികള്‍ തൊഴിലിടം ഉപേക്ഷിച്ച് ഗ്രാമങ്ങളിലെ വീടുകളിലേക്ക് പോയിരിക്കുകയാണ്. ഇതെല്ലാം സാമ്പത്തിക മേഘലയെ തകിടം മറിച്ചിരിക്കുകയാണ്. ലോക്ക്ഡൗണ്‍ കൂടുതല്‍ നീണ്ടുപോയാല്‍ സാമ്പത്തിക രംഗം അതിന്‍റെ ഏറ്റവും മോശം അവസ്ഥയിലേക്ക് നീങ്ങുമെന്നും ലോകബാങ്ക് മുന്നറിയിപ്പ് നല്‍കി.
ഇപ്പോഴത്തെ സാഹര്യത്തില്‍ ജനങ്ങള്‍ക്കുണ്ടായിട്ടുള്ള സാമ്പത്തിക പ്രയാസം കുറയ്ക്കുന്നതിനും തൊഴിലില്ലാത്ത കുടിയേറ്റ തൊഴിലാളികളെ സഹായിക്കുന്നതിനും കൂടുതല്‍ സാമ്പത്തിക സഹായ നടപടികള്‍ പ്രഖ്യാപിക്കാന്‍ ലോകബാങ്ക് നിര്‍ദ്ദേശിക്കുന്നു. അതുപോലെ തന്നെ ബിസിനസുകള്‍ക്കും വ്യക്തികള്‍ക്കും കടാശ്വാസവും പ്രഖ്യാപിക്കണമെന്നും ദക്ഷിണേഷ്യന്‍ രാജ്യങ്ങളോട് ലോകബാങ്ക് ആവശ്യപ്പെട്ടു.
ലോക്ക്ഡൗണ്‍ ബാധിച്ച ദശലക്ഷക്കണക്കിന് പാവങ്ങള്‍ക്ക് നേരിട്ട് പണം കൈമാറ്റം ചെയ്യുന്നതിന് 23 ബില്യണ്‍ ഡോളറിന്‍റെ സാമ്പത്തിക പദ്ധതി ഇന്ത്യ ഇതുവരെ പുറത്തിറക്കിയിട്ടുണ്ട്. അയല്‍രാജ്യമായ പാകിസ്ഥാനില്‍ 6 ബില്യണ്‍ ഡോളറിന്‍റെ പദ്ധതി സര്‍ക്കാര്‍ പ്രഖ്യാപിച്ചു. ഇത്തരം നടപടികള്‍ കൂടുതല്‍ ശക്തിപ്പെടുത്തണമെന്നാണ് ലോകബാങ്ക് ആവശ്യപ്പെടുന്നത്.
