വീരപ്പന് പുറത്തുനിന്നും പിന്തുണയുണ്ടായിരുന്നു : വീരപ്പന്‍റെ അനന്തരവന്‍ മോഹനന്‍

“32 പോലീസുകാരെ കൊന്നുവെന്നത് ശരിയാണ്. ഗ്രാമത്തിലെ പെണ്‍കുട്ടികളെ ബലാത്സംഘം ചെയ്തപ്പോഴാണ് 32 പോലീസുകാരെ കൊല്ലേണ്ടി വന്നത്. കര്‍ണ്ണാടകയുടെ പ്രത്യേക പോലീസ് സംഘം ആദിവാസികളെയും ആടിനെ മേയ്ക്കാനായി കാട്ടില്‍ പോകുന്ന ഗ്രാമവാസികളെയും പിടിച്ചുകൊണ്ടുപോയി വൈദ്യുതി കമ്പിയില്‍ പിടിപ്പിക്കുമായിരുന്നു. അതുകൊണ്ടാണ് അദ്ദേഹം പോലീസിന് നേരെ ആക്രമണം നടത്തിയത്. കിട്ടിയ സമ്പാദ്യമെല്ലാം അദ്ദേഹം പാവങ്ങള്‍ക്ക് നല്‍കുമായിരുന്നു…” അമ്മാവന്‍ വീരപ്പനെ കുറിച്ച് ചോദിക്കുമ്പോള്‍ മോഹനന്‍ വൈകാരികനാകും. ഓര്‍മ്മകളില്‍ കണ്ണ് നിറയുമ്പോഴും മോഹനന്‍റെ വാക്കുകളില്‍ വീരത്വമായിരുന്നു.. ”അവന്‍ എന്‍റെ അമ്മയുടെ സഹോദരനാണ്. 2004 ഓഗസ്ത് മാസം രാവിലെ കണ്ണ് ഓപ്പറേഷന് വേണ്ടി പോകുമ്പോള്‍ പോലീസും രാഷ്ട്രീയക്കാരും ചേര്‍ന്ന് അദ്ദേഹത്തെ വെടിവെച്ച് കൊല്ലുകയായിരുന്നു. 31 വര്‍ഷം സത്യമംഗലം കാട് ഭരിച്ചിട്ടും ഒന്നും സ്വന്തമായി സമ്പാദിച്ചിട്ടില്ല. പെണ്‍കുട്ടികളെ കല്ല്യാണം കഴിച്ചുവിടാനും മറ്റുമായി ഗ്രാമത്തിലെ ജനങ്ങള്‍ക്കാണ് പണം നല്‍കിയത്.”

മലപ്പുറം തിരൂരിലെ തോട്ടപ്പണിക്കാരന്‍ മോഹനന്‍റെ വാക്കുകള്‍ തരംഗമാവുകയാണ്. മോഹനന്‍ വെറും തോട്ടപ്പണിക്കാരനല്ല, ഒരുകാലത്ത് ദക്ഷിണേന്ത്യ വിറപ്പിച്ച വീരപ്പന്‍റെ സഹോദരി പാപ്പാത്തിയുടെ പുത്രനാണ്. 2014 ഒഗസ്തിലാണ് മോഹനന്‍ തിരൂരിലെത്തിയത്. വീരപ്പന്‍ സ്റ്റൈലിലുള്ള വേഷവും മീശയും മൂര്‍ച്ചയേറിയ വാക്കുകളും ഊര്‍ജസ്വലനുമാണ് മോഹനന്‍.
പുതിയങ്ങാടി കോട്ടത്തറയിലെ അദ്നാന്‍ മാന്‍ഡ്രിസ് തന്‍റെ ഒരു കൂട്ടുകാരന്‍ വഴിയാണ് മോഹനനെ പരിചയപ്പെടുന്നത്. പിന്നീട് അദ്നാന്‍റെ വീട്ടുവളപ്പില്‍ ജോലിക്കാരനായി. വീട്ടുകാര്‍ക്ക് വിശ്വസ്തനും പ്രിയങ്കരനുമായി. നാട്ടുകാര്‍ക്ക് വിശ്വാസമുള്ള ആത്മാര്‍ത്ഥതയുള്ള പണിക്കാരനാണ് ഇന്ന് മോഹനന്‍. ”പുലര്‍ച്ചെ ആറ് മണിക്ക് പറമ്പില്‍ ഇറങ്ങും. പിന്നെ പണി കഴിഞ്ഞേ തിരിച്ചു കയറു. ഇടയ്ക്ക് ഇടവേള കിട്ടിയാല്‍ അമ്മാവന്‍ വീരപ്പനെ പറ്റി കഥകള്‍ പറയും. എല്ലാവര്‍ക്കും മോഹനനെ വിശ്വാസമാണ്. ഇയ്ക്ക് അമ്മാവന്‍റെ വീരകഥകള്‍ പറയാന്‍ തുടങ്ങിയതോടെ നാട്ടിലാകെ പാട്ടായി. അങ്ങനെ കഴിഞ്ഞ ദിവസം പത്രക്കാരും ടിവിക്കാരും വന്നു. അങ്ങനെ എല്ലാവരും അറിഞ്ഞത് കൊണ്ടാകും പോലീസ് സ്റ്റേഷനിലേക്ക് വിളിപ്പിച്ചു. അദ്നാനും അവനും പോലീസ് സ്റ്റേഷനില്‍ ചെന്ന് ഐഡികാര്‍ഡൊക്കെ കാണിച്ചുകൊടിത്തിട്ടുണ്ട്.” അദ്നാന്‍ മാന്‍ഡ്രിസിന്‍റെ ഉമ്മയുടെ വാക്കുകളാണിത്.

”2014 ലാണ് ഞാന്‍ ഇവിടെ പണിക്ക് വന്നത്. കേരളത്തില്‍ ആദ്യമായി എത്തിയ ദിവസം.” മോഹനന്‍ പറയുന്നു.. ”ഇവിടെ പൊകലക്കാര്‍ എന്ന പേരില്‍ ഒരു കുടുംബമുണ്ട്. അവര്‍ പൊകല വാങ്ങാനായി സേലം, എടപ്പാടി എന്നിവിടങ്ങളിലേക്ക് വരിക പതിവായിരുന്നു. ഒരിക്കല്‍ സേലത്തേക്ക് വന്ന അവര്‍ എന്‍റെ അച്ഛനെ കണ്ട് വിശ്വസ്തനായ ഒരു പണിക്കാരനെ വേണമെന്ന് ആവശ്യപ്പെട്ടു. അപ്പോഴാണെങ്കില്‍ നാട്ടില്‍ മഴ കുറവായതിനാല്‍ കൃഷിയൊന്നും ഉണ്ടായില്ല. അച്ഛന്‍ എന്നോട് അവരുടെ കൂടെ പോകാന്‍ പറഞ്ഞു. അങ്ങനെയാണ് തിരൂരിലെത്തിയത്. പിന്നീട് ഇവിടെ (അദ്നാന്‍റെ വീട്ടില്‍), അടുത്തുള്ള കുറച്ച് വീടുകളില്‍ ഒക്കെ പണിക്ക് പോകും. എന്നെ ഇവിടെ നല്ല വിശ്വാസമാണ്. പണിക്ക് കൂലിയും നിറയെ ഭക്ഷണവും തരും. ഇവിടുത്തെ ആളെ പോലെയാണ് ഞാന്‍ ഈ വീട്ടിലും നാട്ടിലും ജീവിക്കുന്നത്. നാല് വര്‍ഷമായി ഇവിടെ.” 

അമ്മാവന്‍ വീരപ്പനെ കുറിച്ചാണ് മോഹനന് ഏറെയും സംസാരിക്കാനുള്ളത്. ”മദേസ്വരമലയില്‍ നിന്ന് മൈസൂര് വരെയുള്ള 25,000 ഏക്കര്‍ വനമാണ് സത്യമംഗലം. അതിനകത്ത് എന്ത് നടന്നാലും വീരപ്പന്‍ അറിയും. പെണ്‍കുട്ടികളെ പോലീസുകാര് ബലാത്സംഗം ചെയ്തതിന് പ്രതികാരമായി 32 പോലീസുകാരെ അദ്ദേഹം കൊന്നു. അതാണ് പോലീസിന് പക കൂടാന്‍ കാരണം. രാജ്കുമാറിനെ തട്ടിക്കൊണ്ടുപോയതിനെ തുടര്‍ന്ന് നക്കീരന്‍ ഗോപാലന്‍ അവിടെ ചെന്നിട്ടുണ്ടല്ലോ. അവര്‍ക്കതെല്ലാം അറിയാം. തടവില്‍ വെച്ച ആരെയും വീരപ്പന്‍ ഒന്നും ചെയ്തില്ല. പകരം ജനങ്ങളുടെ കഷ്ടപ്പാട് എന്തൊക്കെയാണെന്ന് പറഞ്ഞുകൊടുക്കുകയായിരുന്നു. ആവശ്യമില്ലാതെ കര്‍ണ്ണാടക പോലീസ് സത്യമംഗലം കാട്ടില്‍ ചെയ്തുകൂട്ടുന്ന അക്രമത്തെ പറ്റിയാണ് അന്ന് നക്കീരന്‍ വഴി കര്‍ണ്ണാടക മുഖ്യമന്ത്രിയെ വീരപ്പന്‍ അറിയിച്ചത്. വീരപ്പന്‍റെ ആളുകളാണെന്ന് പറഞ്ഞ് കര്‍ണ്ണാടക പോലീസ് അന്ന് 22 പേരെ കൊന്നുകളഞ്ഞു. അവര്‍ ആരും വീരപ്പനെ കണ്ടിട്ടുപോലും ഇല്ലായിരുന്നു. അതിനെ പറ്റി തമിഴ്നാട്ടിലെ മക്കള്‍ ടിവിയില്‍ വാര്‍ത്തകളുണ്ടായിരുന്നു.” മോഹനന്‍ വിവരിച്ചു.

കൊളത്തൂരിനടുത്ത് മൂളക്കാടെന്ന ചെറിയ ഗ്രാമത്തില്‍ ആട് മേച്ചും കൃഷി ചെയ്തും വീരപ്പന്‍റെ കുടുംബം ജീവിക്കുന്നുണ്ട്. മോഹനന്‍ ഉള്‍പ്പെടെ എല്ലാവരും ഗ്രാമത്തില്‍ ഒരേ സ്ഥലത്താണ് താമസിക്കുന്നത്. മൂത്തമകള്‍ പത്മറാണി കോളേജില്‍ ഒരുമിച്ച് പഠിച്ച ഒരാളുമായി വിവാഹം കഴിച്ചുപോയതിനെ തുടര്‍ന്ന് അവരുമായി കുടുംബം വലിയ ബന്ധത്തിലല്ല ഉള്ളത്. വീരപ്പന്‍റെ ഭാര്യ മുത്തുലക്ഷ്മിയും ഇളയ മകള്‍ പ്രഭാവതിയും ഒരുമിച്ചാണ് താമസം. പ്രഭാവതിയുടെ കോളേജ് പഠനം ഈ മാസം അവസാനിക്കുമെന്നും മോഹനന്‍ പറയുന്നു. ഇപ്പോള്‍ പോലീസില്‍ നിന്നും ഒരുവിധ പ്രശ്നവും കുടുംബത്തിനില്ല. കാട്ടില്‍ ഒരു സ്വതന്ത്ര്യ രാജ്യം നടത്തിയെന്നതും മൃഗങ്ങളെ വെടിവെച്ചുകൊന്നും എന്നതുമായിരുന്നു കുറെ കേസുകള്‍, അതെല്ലാം അവസാനിച്ചു. ആരുടെയും പിന്തുണയില്ലാതെ വീരപ്പന് തനിച്ച് അത്ര വലിയ ഒരു മേഖല ഭരിക്കാന്‍ കഴിയുകയില്ലെന്നും പുറമെ നിന്നും നല്ല പിന്തുണ ഉണ്ടായിരുന്നെന്നും മോഹനന്‍ പറഞ്ഞു.

തന്‍റെ പതിനേഴാമത്തെ വയസിലാണ് മോഹനന്‍ വീരപ്പനെ കണ്ടത്. അന്ന് കുറച്ചുനേരം സംസാരിച്ചിരുന്നു. അവസാനമായി കാണുന്നത് 2004 ല്‍ വെടിവെച്ച് കൊല്ലപ്പെട്ട ശേഷം ധര്‍മ്മപുരിയില്‍ പോസ്റ്റ്മോര്‍ട്ടം ചെയ്യാന്‍ കൊണ്ടുവന്നപ്പോഴാണെന്നും മോഹനന്‍ ഓര്‍മ്മിച്ചു. വീരപ്പന്‍റെ കുടുംബം എന്ന നിലയ്ക്ക് കുറെ നാള്‍ പ്രശ്നമുണ്ടായിരുന്നെങ്കിലും ഇപ്പോള്‍ പ്രശ്നമൊന്നും ഇല്ലെന്ന് മോഹനന്‍ അഴിമുഖം പ്രതിനിധി യാസിറിനോട് പറഞ്ഞു. കൂടുതല്‍ സംസാരിച്ച് വെറുതെ പ്രശ്നം ഉണ്ടാക്കുന്നത് എന്തിനാണെന്നും മോഹനന്‍ പറയുന്നു.
വീട്ടുവളപ്പിലെ ജോലിത്തിരക്കിനിടയില്‍ നിരവധി പേരാണ് ഇപ്പോള്‍ വീരപ്പന്‍റെ മരുമകനെ കാണാനെത്തുന്നത്. ഇത് ഒരു പുലിവാലാകുമോ എന്നാണ് ഇപ്പോള്‍ അദ്നാന്‍റെ പേടി. ”വിശ്വസ്തനായ പണിക്കാരനാണ്. ആത്മാര്‍ത്ഥതയുമുണ്ട്. വീരപ്പന്‍റെ വേഷമണിയുന്നത് ഒരു കൗതുകവുമാണ്. മറ്റ് പുകില്‍ ഉണ്ടാകില്ലായിരിക്കും.” അദ്നാന്‍ പ്രതീക്ഷയിലാണ്.