കവിത : വീണ്ടും വാലിളക്കുന്ന വായന – പി.കെ ഉണ്ണികൃഷ്ണന്‍
വായന….
ഏറെ തണുത്ത്,
ഇമയടയ്ക്കാതൊരു വാക്ക്,
വരിയിലേയ്ക്കിഴഞ്ഞു പോകുന്നു……
വരിയില്‍,
ഇരുവാക്കുകള്‍ക്കിടയില്‍ നുഴഞ്ഞ്,
അത് വെയിലു കായുന്നു,
ഇനി വായനയ്ക്കൊരുങ്ങുക …
കണ്ണ് കൊണ്ടാവാം,
അന്ധനാണെങ്കില്‍ വിരല്‍ത്തുമ്പ്,
കല്ലുകൊണ്ടാവാം ,
അതുമല്ലെങ്കില്‍ വടിക്കഷ്ണം….
ഒറ്റ വായനയ്ക്കതിന്‍ ചലനം നിലയ്ക്കണം,
ഒട്ടു കൂടുതല്‍ നേരം വാല്‍ മാത്രമിളകട്ടെ !
പിന്നെയും വായിക്കുവാനെത്തുവോരാരെങ്കിലും,
എത്തിച്ചു കൊള്ളും പെട്രോള്‍ ,
തീപ്പെട്ടിയുണ്ടോ കയ്യില്‍ ?
ചത്താലും മരിക്കില്ല വായന !
അറിയാതെ തൊട്ടുപോയെന്നാല്‍,
അതു ദംശിക്കും ,
കരുതുക…..!
